O vindeiro 14 de xaneiro comezarán as obras emerxencia no claustro gótico do convento de San Francisco en Ourense. Trátase de actuacións que pretenden paliar o grave deterioro dun recinto que é Monumento Nacional e Ben de Interese Cultural. As obras de emerxencia, autorizadas por vía xudicial, desenvolveranse durante 4 meses e teñen un orzamento de 1.7 millóns. O complexo estaba precintado polo litixio que manteñen a primeira empresa adxudicataria das obras de recuperación do convento e o Ministerio de Cultura.

O jazz da coruña cumpre 25 anos. Os mesmos que ten Clunia, a formación liderada por Nani García que organiza desde hai catro anos o festival de jazz, Iberojazz. Esta edición do certame desenvólvese do ao 15 ao 31 de xaneiro en teatros e clubes da cidade. Dez concertos que nesta ocasión pretenden achegar o jazz feito en Portugal coa presenza do lisboeta Zé Eduardo Unit ou co concerto que darán estudantes das escolas superiores de música de A Coruña e Oporto. Abre o programa unha mesa redonda sobre o jazz en tempos de crise.

Coñecer os principais movementos artísticos, a súa contextualización, as figuras claves de cada época desde principios do século XX ata a Segunda Guerra Mundial. Este é o contido do curso Aproximación á creación IV: A vangardas históricas (1900-1945) que acaba de convocar o Centro Galego de Arte Contemporánea (CGAC). O curso dirixido por María Álvarez Cebrián e coordinado por Virginia Villar, dará comezo o día 20 de xaneiro e desenvolverase no primeiro semestre estruturado en vinte clases teóricas e seis prácticas.

Axudas a distribución de películas comunitarias (BOE do 5 de xaneiro), conservación de negativos e soportes orixinais (BOE do 6 de xaneiro) e produción de curtametraxes (BOE do 7 de xaneiro) son as tres liñas de axudas que acaba de convocar o Ministerio de Cultura, a través do Instituto de Cinematografía e Artes Audiovisuais (ICAA). En total destinaranse seis millóns de euros a estes conceptos con cargo ao Fondo de Protección á Cinematografía. O prazo de presentación de solicitudes nas tres liñas de axudas xa está aberto.

Desde onte, os estadounidenses poden mercar o primeiro volume de Hexed, a serie que está a realizar Emma Ríos para a editora Boom! Studios. O responsable da firma, Mark Waid, puxo tamén en YouTube un video promocional da serie, e deixou para a libre descarga un pdf dese primeiro volume. Pola súa banda, Emma Ríos adianta no seu blog a capa do cuarto número, no que traballa actualmente.

Unhas das partes da Berlinale, o festival de cine de Berlín, é o seu mercado audiovisual, o European Film Market que se celebra do 5 ao 15 de febreiro. Un espazo ao que asisten produtores, distribuidores, compradores e axentes de venda para facer tratos, entablar novas relacións e estar ao día do que acontece no sector. Unha cita é que asistirán dez empresas do Clúster Audiovisual Galego. Xamalú Filmmes, Voz Audiovisual, Adivina Producións, Ficción Producións, Formato Producións, Filmanova, Continental, Abano Producións e Perro Verde Films son as empresas están acreditadas para participar nos screenings así como para asistir a selección oficial.

Internet xa non é o que era. É moito máis. A normalización do uso da rede por parte dos axentes culturais, e unha cifra crecente de usuarios que acceden á rede están a cambiar a fisonomía, os servizos e os contidos de Internet. Galicia non é allea a este fenómeno que se transforma constantemente. Repasamos que pode dar de si a rede no 2009 na cultura galega.

Máis cursos (un total de catro), máis horas (de 30 a 45) e máis cidades (Santiago, Vigo e A Coruña). A consellaría de Educación e o Consorcio Audiovisual de Galicia repiten a experiencia dos seus cursos monográficos de inglés audiovisual. A convocatoria, que terá lugar a vindeira semana, permitirá a profesionais e estudantes do sector audiovisual mellorar o seu nivel de inglés. O Consorcio financiará o 50% das taxas da matrículas dun curso que impartirá na Escola Oficial de Idiomas e ofertará actividades extraacadémicas relacionas co contidos (visitas a rodaxes, organización de master classes ou proxeccións de filmes).

O documental 35 anos de historieta galega, producido por El Patito Editorial, TV7 e TVG, está xa dispoñible en versión DVD. O filme, de 55 minutos de duración, fai un percorrido pola historia dos nosos cadriños desde os anos setenta ata a actualidade. A maiores, El Patito anuncia, para o vindeiro mes de febreiro, a edición do álbum Estampas malignas de Alfons Figueras.

Inaugurouse en Bueu no 2002 e desde entón pasaron polo centro 120.000 persoas. No último ano o museo Massó recibiu preto de 20.000 visitantes, o que supón un descenso con respecto ás cifras do 2007. Sen embargo, desde o propio museo confían en poder aumentar os rexistros neste ano. O motivo é que confían en que teña lugar a rehabilitación e ampliación do edificio que lle permita reforzar a súa oferta.

Rafael Moneo é o arquitecto escollido polo Concello de Vigo para transformar o espazo que rodea o edificio consistorial da cidade. O seu proxecto para a zona que vai desde o castelo de San Sebastián ata a ladeira do Castro non encaixa co emprazamento que se establecera para a biblioteca estatal nun edificio na Praza do Rei. De momento, segundo publica hoxe Faro de Vigo, non hai nada decidido pero o posible cambio de emprazamento obrigaría a adiar as obras de construción que xa estaban presupostadas no Ministerio de Cultura.

Chegaron a ser un auténtico fenómeno social no noso país. Agora, o popular dúo cómico Os Tonechos anuncia a súa separación temporal. Tanto Roberto Vilar coma Víctor Fábregas sinalaron que non van facer polo momento novos programas para a Televisión de Galicia e que teñen abertas as opcións para desenvolver outros proxectos por separado. De calquera xeito, insisten en que non existe ningún problema entre eles e que é posible que o dúo volte no futuro.

Desde os anos 60 amosou o seu interese pola lingua e a cultura galega, e o seu traballo foi recoñecido xa en 1995 cun premio Pedrón de Honra. Agora, o escritor madeirense José Viale Moutinho incorpórase á Real Academia Galega coma Membro de Honra, sumándose a John Rutherford e a Giuseppe Tavani entre os estudosos que teñen esta condición. A decisión tomouna o pasado 20 de decembro o plenario da RAG por unanimidade, e foi recollida o pasado día 5 por diferentes medios portugueses. Non hai aínda data para toma de posesión do homenaxeado. Precisamente Viale Moutinho publicará en breve a obra Negra sombra! negra sombra! no noso país, segundo adianta Xosé Luís Méndez Ferrín na súa columna do Faro de Vigo.

A Asociación Galega de Deseñadores estrea unha nova etapa coa mostra En torno da Baskerville, unha reflexión na que estes profesionais interpretan o libro coma obxecto artístico. O CGAC acolle, desde as oito desta tarde, unha exposición que conta con nomes coma Lía Santana, X. María Torné, Pepe Barro, Uqui Permui, Daniel Bembibre, Antón Lezcano, Álvaro Valiño, Pancho Lapeña, Gisela, Ahumada, J. Ramón Méndez, Javier Pérez, Jon Solozabal ou Alberto Montiel entre moitos outros, poderá verse ata o vindeiro 1 de marzo.

Feito desde Vigo e cunha boa dose de autores galegos, o fanzine ETT, Revista para los jóvenes chega á súa segunda entrega e achega a posibilidade de se descargar directamente en formato PDF. A publicación, que está á venda por tres euros, conta con 40 páxinas en branco e negro e capa a cor. Entre os colaboradores atopamos nomes coma Jano, Martín Romero, Jorge Taboada, Ángel, Pelucas ou Ricardo Mena entre outros.

O Ministerio de Cultura acaba de facer públicos os datos sobre edición nos dous primeiros trimestres de 2008. Segundo estas estatísticas, e de se manter a tendencia no último trimestre, o ano que acaba de finar contemplou un incremento destacado da edición no noso país, con 2.359 títulos, dos cales 1.466 (o 62%) saíron en galego. Debemos pensar que en todo 2007 saíron no noso país 2.364, dos que estaban en galego 1.472. Máis datos sobre edición no noso dosier.

Hai 59 anos xa que finala Castelao. En conmemoración do seu cabodano, o país énchese hoxe de actos de homenaxe. Un dos principais desenvolverase ás cinco da tarde no Panteón de Galegos Ilustres en San Domingos de Bonaval da man da Fundación que leva o nome do rianxeiro. Precisamente a Fundación anunciou que para finais de 2009 estará rematado o catálogo completo da obra deste ilustre galeguista, un proxecto dirixido por Miguel Anxo Seixas e que pretende clasificar arredor de 3.000 pezas que se atopan repartidas entre Galicia, Madrid, Sudamérica e Estados Unidos. O proxecto, apoiado pola Consellaría de Cultura prevé a dixitalización dos fondos, que serán accesibles no Arquivo Nacional de Galicia.

Este ano é o XXV aniversario do Centro Dramático Galego e, para comezar a conmemoración, o CDG regalará 50 entradas para ver a primeira función da nova tempada de Noite de Reis. Ou o que queirades, o clásico de Shakespeare dirixido e versionado por Quico Cadalval. Noite de Reis acadou un éxito de público sen precedentes na escena galega e ese é o motivo polo que a compañía pública de teatro repón a obra durante esta tempada. As entradas pódense conseguir chamando por teléfono ás oficinas do CDG (981 58 11 11) entre hoxe e mañá en horario de 9.00 a 14.00 horas. Entregaranse un máximo de dúas localidades por persoa até completar as 50.

O crítico pamplonés Ramón Herrera acaba de publicar o libro Cine jacobeo. El Camino de Santiago en la pantalla, no que realiza unha escolma de 22 títulos audiovisuais nos que o Camiño de Santiago desempeña un papel argumental ou de escenario relevante. Co gallo desta publicación, repasamos o extenso catálogo de AVG para localizar producións galegas vinculadas ao Camiño.

As políticas públicas culturais que veremos en 2009 desde o goberno autonómico van estar marcadas, fundamentalmente, pola continuidade. A celebración das eleccións en marzo fará que, malia á previsible renovación da Consellaría de Cultura, os novos responsables atopen un orzamento xa fechado (ademais de restritivo) que non lles permitirá grandes innovacións neste campo. Non cabe dúbida de que ao longo dos vindeiros meses, sobre todo a partir da primavera, irán aparecendo as liñas do equipo que rexerá este departamento de cara aos vindeiros catro anos e, sen dúbida, veremos tamén novos proxectos. Pero haberá que agardar ata os orzamentos de 2010 para que o programa, sexa o que sexa, comece a se traducir plenamente en realidades.